Grupu Pre-Fabrika

     

Objetivu husi estabelesementu Makina Pré-Fábrika Bambu iha grupu komunidade agrikultór bambu sira iha munisípiu mak atu dezenvolve sistema produsaun descentralizadu ne'ebé bele fó benefísiu direta ba komunidade rural no suporta dezenvolvimentu indústria bambu nasional.

Inisiativa ida ne'e sei kria oportunidade servisu ba joven sira iha área rural, hodi aumenta empregu lokal, reduz migrasaun ba sidade, no promove partisipasaun aktivu komunidade iha cadeia valor bambu. Liu husi prosesamentu inisiál iha nivel komunidade, agrikultór bambu sira sei bele aumenta valor ekonomiku husi sira-nia produtu, nune'e kontribui direta ba hasa'e rendimentu família no melhora moris komunidade.

Mekanismu ne'e bazeia ba esperiénsia Instituto do Bambu durante faze inisiál implementasaun programa, ne'ebé hatudu katak modelu sentralizadu hodi sosa au-tronku no lori ba sentru prosesamentu implica kustu lojístika no transportasaun ne'ebé aas tebes, dalar barak liu kompara ho rezultadu produsaun ne'ebé hetan. Situação ida ne'e afeta efisiénsia operasional no sustentabilidade finanseira institusionál.

Ho estabelesementu Pré-Fábrika Bambu iha munisípiu sira, komunidade sei halo prosesamentu inisiál ba matéria-prima iha fatin produsaun rasik, hodi redus volume no kustu transportasaun ba sentru akumulasaun no manufatura. Sistema ida ne'e sei fó responsabilidade direta ba grupu joven no agrikultór sira atu jere no opera unidade pré-fábrika, fortalece kapasidade lokal, aumenta efisiénsia cadeia suprimentu, garante fornecimentu matéria-prima ho padraun qualidade di'ak, no cria impaktu ekonomiku no sosial ne'ebé sustentável ba komunidade rural.

Implementasaun modelu ida ne'e sei marka diferensa pozitivu boot ba dezenvolvimentu setor bambu iha Timor-Leste, tanba la deit reduz kustu operasional Instituto do Bambu, maibé mos promove industrializasaun rural, empoderamentu juventude, no aumenta kontribuisaun setor bambu ba kresimentu ekonomia nasional.